Espouscado, Frederi MISTRAL

ESPOUSCADO

En vesènt crèisse li boufigo
E s'aflaqui li bon mamèu
E se nebla li bèlli figo
E s'espoumpi li gargameu,
En vesènt, lengo prouvençalo,
Que sèmpre mai rougnon tis alo,
En vesènt vuei lou sèn tant rar
E la reso un bèn tant caluga,
Avès de jour que la belugo
Gisclo souleto dóu peirard.

Cresès qu'acò nous vous enfèto,
D'ausi de-longo remena
Qu'eilamont tóuti soun proufèto,
Qu'eiçavau sian tóuti mau-na !
D’ausi pertout, dins lis escolo,
Regènt, reitour, touto la colo
Que fau paga de nòsti sòu,
Nous reproucha coume uno taco
Lou paraulis que nous estaco
A nòsti paire, à noste sòu !

Crese qu’acò noun vous empego,
Quand, libre e fièr coume Artaban,
Avès toujour fa vosto plego,
Ve plus poudé dire de pan !
De plus ausa counta si peno,
Ni demanda 'n sòn de tapeno
A la boutigo de l'endré
Pèr alesti soun ourdinàri,
Sènso recourre au diciounàri
De Bescherelle o de Littré !

Cresès qu’acò n'es pas terrible,
De vous falé tout renonça,
La ferigoulo e bon--rible
Onte anavias vous trigoussa,
Tóuti li terme dóu terraire,
La poudadouiro emé l'araire,
L'embut, la dourgo e lou draiet,
Tóuti li mot de nòsti rèire,
Lou trissadou ‘mé lou moulèire
Ounte foundian lou rèst d'aiet !

Cresès qu'acò noun vèngue en òdi,

Quand disès « Ma maire m'a fa, »
D’ausi de-longo aquest senòdi :
« Quau te fagnè, fau l'estoufa ;
Fau, emai siegue cando e gènto.
Atura la font que sourgènto ;
Fau escupi contro toun cèu ;
Fau amudi l'auro que bramo
A toun arquiero, e dins ta ramo
Fau despicha li nis d'aucèu ! »

Eh ! bèn, nàni ! despièi Aubagno,
Jusqu'au Velai, fin-qu'an Medò.
La gardaren riboun-ribagno,
Nosto rebello lengo d'O !

La parlaren dins li vanado,
I meissoun, i descoucounado,
Entre amourous, entre vesin ;
La charraren emé salivo
En barrejant nòstis óulivo,
En destregnènt nòsti rasin.

La menaren, li jour de pesco,
Pèr espandi l'embarradou,
Tira lou bòu, chapla li lesco
E regala li pescadou ;
La menaren, li jour de casso,
Pèr espóussa li tiragasso.
Pèr saupica lou ressoupet ;
La menaren, li jour de casso,
Pèr dansa ‘m’elo la gavoto,
La farandoulo e lou tripet.

Sara la lengo de la joio
Emé de la freirejacioun ;
La quilaren sus li mount-joio
De pastrihoun à pastrihoun ;
Emé li fraire de la targo
Que s'encloutisson la poutargo
La cantaren sus lou paiòu ;
La cridaren dins li bravado ;
E l'ourlaren is abrivado,
Quand se fara courre li biòu.

A la begudo, pèr la fiero
De Sant Andriéu o de Sant Jan.
Emé la foulo parlufiero
Fara brindoio en pachejant.
Galejaren, rizen em' elo
En acanant nòstis amelo ;
E pèr l'armado, pièi, aqui
Se fau leis fen e luserno,
L'empourtaren à la caserno
Pèr nous en garda de langui.

Ah ! li foutrau de tantalòri
Que n'en desmamon sis enfant,
Pèr li clafi de vano-glòri,
D'arrougantige emé de fam !
Dins lou bourboui, zóu ! que s'ennègon !
Mai tu, di fiéu que te renègon
E qu'estratisson ton parla,
Vai, noun t'inquietes, ma Prouvènço !
Es de mourtoun en survivènço
Qu'auran nourri de marrit la.

Li vièi castèu, di Baus, de Signo,
De Pèiro-Fiò, de Roumanin,
Ié diran pas la glòri ensigno,
Lou teta-dous, lou biais menin
De nòsti gràndi segnouresso,
En Gai-Sabé tóuti mestresso ;
Lou tambourin que vai mourènt,
Lou repiquet de l'ermitòri,
Ié diran pas soun languitòri ;
Li vièi camin ié diran rèn. 

Ié diran rèn nòsti legèndo ;
Rèn ié dira lou cachta-fiò
Que flamejavo pèr Calèndo...
Éli n'auran d'amour en-liò.
Di maire-grand, en sa supèrbi,
Retendran pas ti reprouvèrbi
E li sourneto e li fablèu ;
Coumprendran plus ço que babiho
Lou tavan rous emé l'abiho ;
Couneiran plus l'ouro au soulèu.

Mas, lis einat de la naturo,
Vous-àutri, li brun cadelas
Que dins l'antico parladuro
Emé li drolo vous parlas,
Agués pas pòu : restarés mèstre !
Tan que li nóuguié dóu campèstre,
Rufe, gaiard, siau, estadis,
Emai vous dèimon e vous groumon,
O païsan (coume vous noumon),
Restarés mèstre dóu païs.

Envirouna de l'amplitudo
E dóu silènci di gara,
Tout en fasent vostro batudo,
Au terradou sèmpre amarra,
Vesès, alin, coume un tempèri,
Passa lou trounfle dis empèri
E l'uiau di revoulucioun :
Atetouni sus la patrio,
Veirés passa li barbario
Emai li civilisacioun.

2 de nouvèmbre 1888

Frederi MISTRAL