Lo Boecis, mai ancian monument literari de lenga d’oc (1era mitat sègle XIen)

Publié le par Agach occitan

XXIII

Cum jaz Boécis e pena, charceraz,

Plan se sos dols e sos menuz pecaz,

D’una donzella fo laínz visitaz :

Filla’s al rei qui a granz poestaz.

Ella’ta bella, reluz ént lo palaz.

Lo mas o intra, inz es granz claritaz ;

Ja no es obs fox i sía-alumnaz :

Veder pot l’om per quaranta ciptaz.

Qual ora-s vol, petita-s fai asaz ;

Cum ella s’auça, cel a del cap polsat ;

Quant be se dreça lo cel a pertusat,

E ve laínz tota la majestat.

 

XXIV

Bella’s la donna e-l vis a ta preclar,

Davan so vis nulz om no-s pot celar ;

Ne eps li omne qui sun ultra la mar

No potden tant e lor cors cobeetar

Qu’ella de tot no vea lor pessar.

Qui-e leis se fía, morz no l’es a doptar.

     

XXV

Bella’s la donna, mas molt es de longs dis,

No-s pot rascundre nulz om denant so vis.

Hanc no vist omne, ta grant onor aguis,

Si-l forfez tan dont ella-s ranguris,

Sos corps ni s’arma miga per ren guaris ;

Quoras que-s vol s’en a lo corps aucis

E pois met l’arma en effern e somsis :

Tal li comanda qui totz dias la bris.

Ella metesma ten claus de paradis,

Quoras que-s vol, lainz col sos amigs.

Bels sun si drap, no sai nommar lo fil,

Mas molt per foren de bon e de sobtil.

Ella se-ls fez, avía-anz plus de mil.

Ta no son vel, miga lor prez avil.

 

XXVII

Ella medesma teiset so vestiment

Que negus om no pot desfar neient.

Pur l’una fremna qui vers la terra pent

Non comprarías ab mil líuras d’argent.

Ella ab Boéci parlèt ta dolzament :

« Molt me derramen donzellet de jovent,

Que zo espéren que faza a lor talen.

Primas me ámen, poís me van aïssent ;

La mí’amor ta mal van deperden ».

 

XXVIII

Bel sun li drap que la domn’a vestit ;

De caritat e de fe sun bastit.

I sun ta bel, ta blanc e ta quandid,

Tant a Boécis lo vis esvanuit

Que el zo pensa : uél síen amosit.

 

Re publicacion de R. Lavaud et G. Machicot : Boecis,  poème sur Boèce (fragment), le plus ancien texte littéraire occitan édité, traduit et commenté, Toulouse, IEO, 1950

 

Publié dans Escriches- Poesia

Pour être informé des derniers articles, inscrivez vous :

Commenter cet article