"Partit Prouvençau" de Pau RICARD e Carle CAMPROUS
Assabé sus lou "Partit Prouvençau" de Pau RICARD e Carle CAMPROUS
cf. http://provence-libre.150m.com/Lou_Partit_Prouvencau.htm
Lou vertadié proumié mouvement pouliti dei Païs d'O es un mouvement prouvençau. Lou "Partit Prouvençau" (en francés "Parti Fédéraliste Provençal") fuguè la souleto secien realament ativo de la federacien dóu "Partit Oucitanisto" situa a Marsiho mai tamben a Mount-Pehié e Toulouso.
Lou mouvement es founda dins leis annado 1934-35. Es crea entre autre pèr Carle CAMPROUX joueine marsihés que defend leis idèo federalisto pouliti, ecounoumi e souciau basa sus lei naciounalita, serà un grand resistent e universitari, Pau RICARD, lou foundadou de la famouso entrepreso dóu meme noum, que devendrà lou presidènt dóu mouvement, Jorgi REBOUL, ...
Lei siéu idèo soun esprimido dins lou "Prougramo Oucitanisto Basi". S'ourganiso en founcien de tres poun : 1- Ourganisacien de l'Estat Prouvinciau, 2- Ourganisacien de la Soucieta oucitano, 3- Poulitico Ecounoumico. Maugra lei ourigino poulitico diverso de sei membre, pèr fa l'unien entre toutei lei tendenço d'O, la pausicien anounçado es claro : si pòu pas servi au còu un parti francés e Oucitanio, "ni rouge, ni blanc, sang e or" autrament di ni gaucho, ni drecho. Camproux afirmo meme dins "Per lo camp occitan" que soun manifèst es de puro doutrino mistralenco.
Si presentèroun pèr esemple eis elecien de 1936 a Brignolo e fuguè un boun coumençament.
Sourgo : ABRATE Laurèns/ Laurent, 2001.
1900-1968. Occitanie, des idées et des hommes. Edicien IEO, 622 p., 38 Èurou.
Veicì un estra d'uno deis aficho que distribuavon dóu tèms deis eleicien de 1936.
"
POPLE PROUVENÇAU !
La Prouvenço es uno MINOURITA NACIOUNALO
Lou Pople Prouvençau n'a proun de si leissa gouverna pèr lei facisto e leis emperialisto dóu Gouvèr de Paris qu'an arrouina la prouducien agricolo dóu Miejour de Franço emé sa poulitico coulounialo...
Lou Pople Prouvençau vòu plus dóu Gouvèr de Paris qu'es pas esta capable d'ourganisa la Pas... e l'Ecounoumio dicho naciounalo...
La Pas de l'Europo es assetado ni sus leis armamen sèns limito, ni sus un semblant de desarmamen, mai bèn sus l'ourganisacien federalo de toutei lei regien ecounoumico e geougrafico e lou respèt de toutei leis ome e de toutei lei raço...
Lou Pople Prouvençau a lou devé, en fouero deis oupinien poulitico catalougado, de dreissa lou Front Coumun prouvençau contro lou facisme e l'emperialisme dóu Gouvèr de Paris e de toutei lei Capitalo guerriero... que nous mènon à la roueino e à la mouart...
Pèr lou Partit Prouvençau :
Pau RICARD, Presidènt. "